Saturday, June 17, 2006

ندون من جديد

أن أبدأ هذه المدونة بهذا النكد هو أمر ليس بيدي


حاسة اني مش مبسوطة خالص ... متضايقة قوي ، ومتنرفزة من غير سبب ، مش عارفة...... اكيد في سبب ، مش سبب واحد ،عشرين .... استمرار حبس المعتقلين ، ماجرى في مذبحة غزة ، وفي حادثة العراق ، يادي النيلة تقرير التايمز عن الحادثة ، ثم تفاصيل وداع الفتاة الفلسطينية الصغيرة لاسرتها ، كدت ابكي اليوم وانا طالعة سلم المترو ، تخيلت ان ابنة شقيقتي ( لا قدر الله لا قدر الله ) في موقف الصغيرة ، انت تذهب مع اسرتك الي الشاطئ ، وفجأة و انت في منتصف الفرح تلاعب الموج ، تنهار السماء ، وانت بعد طفل صغير ...

يادي النكد ..

حاسة اني عروسة ماريونيت ( زي بتوع الليلة الكبيرة ) مربوطة بستين الف خيط ، كل خيط من كل حتة ، وكلهم بيشدوني ويحركوني ف نفس الوقت ، فطبعا طالعة حركة مالهاش اي معني ، عاوزة اطلع مقص كبير ، اقص كل الخيوط ، اقع ع الارض ، اتكوم فوق بعضي ، استريح شوية كتير ، وبعدين اقوم من نفسي اشبك الخيوط اللي لي مزاج اشبكها ، علشان اتحرك زي ما انا عاوزة

عاوزة اسافر بجد بقى ، عاوزة اسافر ع الاقل شهر ، بجد خلاص طهقانة خالص ، المصيبة في الخيوط مش عارفة اقطعها , انا مش عارفة ليه مدية الموضوعات اهمية زيادة ، هو يعني هايحصل ايه بجد ، ولا حااجة خااااالص ، لو انا او اي حد بقى بكرة مش موجود ....

بجد بقى لو في اي حد عنده اي قريب في اي حتة من العالم ان شاء الله زنزبار يبعتله إيميل يستضفني شوية ..

(...............................)
جزء محزوف يراه الاصدقاء المقربون على جنب

..........................................................................................................................................................................

خلاص بقى الساعة واحدة ..وخيط الصبح بيشدني علشان البلاوي المستنية ندوة ومعاد وشيفت وابليكاشن وايميلات ...

( زينب .. دينا ) انا كنت قلت خلاص مالناش ف التدوين تاني ..بس .. الانترنت كان بايظ ..الكلمتين دول كانوا واقفين ف زوري ومش عرفت ابلعهم واقول لنفسي هابقى اكتبهم الصبح ( والصبح طبعا اكون نسيت ) فقعدت كتبتهم

3 comments:

happy boy said...

أن أبدأ هذه المدونة بهذا النكد هو أمر ليس بيدي
ولايهمك احنا فى الوطن العربى العزيز وخصوصا فى مصر متعودين على النكد وبكده وكل المواقع والصحف والمدونات السياسية عودتنا على النكد وكمان على انه الواحد يتسيقظ كل يوم على قناة الجزيرة يلاقى فيه مية ماتوا فى مختلف البلاد العربيه وربنا يستر الدور على مين؟؟؟؟؟؟؟؟؟؟؟ سؤال محير الجميع
وانا حاسس انك صادقه جدا فى مدوناتك

ألِف said...

هو أنت كان لك مجونة قبل كدا؟
يا ريت تكوني سبتيها و ما حذفتيهاش.

Masrawyya said...

الف : تقريبا من يوم ما اخوك عرفني موضوع لتدوين وانا فتحتي بتاع 3 4 مدونات حتى الان ، بعضهم لازال على قيد الحيااة http://a7zandecember.blogspot.com/
حاولت اقلها على بلوج سم وفشلت
ولى مدونة حركية
وبس

مما عنديش فكرة مصروية ستلاقى نفس مصير اخواتها ولا ربنا هايكتب لها العمر الطويل: متشكرين ع الكومنت يا عم الف
يا هابي بوى ثانكس الوت على الكومنتات

ونزورك قريب ان شاء الله