Tuesday, October 17, 2006

يوميات شيكاغو - سواقين التاكسي حكايتهم حكاية

محمد سليم من باكستان : بيسب ويلعن في الحكام العرب ، وبيقول ان العالم الاسلامي لازم يقوم ، الراجل بيشتغل محاسب الصبح وبعد الظهر سواق على تاكسي علشان يصرف على عياله ، عنده ولد اتخرج من كلية طب والتانية لسه بتدرس ( اكل العيش مر حتى ف امريكا ) ، بيقول ان العالم العربي حكامهم لازمهم (تعليم ، حد يتكلم باسمهم و"حكمة "علشان يحكموا صح ) ، وبيقول انه بيعرف نفسه باسمه العائلي سليم ، علشان لو عرف نفسه باسم محمد ده مش كويس

الرجل اتكلم عن الامراء العرب اللي ببيجوا امريكا علشان يصرفوا ع القمار ملايين ، وقال ان الفساد موجود في دول اسيا كمان مع الاستثناء المتحفظ لكل من مالزيا وسلطنة برنواي ، ولقيت في العربية جرنال باكستاني ، قلت فرصة ادور دفة الحديث على السياسة في باكستان بدل ما هو عمال واخدنا غسيل ومكواة ( واخدنا قصدي بيها العالم العربي ) قال عن برفيز مشرف انه لولاه كانت باكستان افغانستان تانية ، وقال على بناظير بوتو ( والله كنت باحبها الست دي ) قال عليها بيس أوف شيت ( عفوا ) وقال عن الفلوس اللي سارقتها من باكستان ، وقال عن دعوة باكستان للعالم العربي لتمويل تصنيع القنبلة النووية لتكون قنبلة اسلامية ورفض الحكام العرب ، الرجال كان بيتكلم بحماس فظيع ويقول وههو بيخبط ع الدركسيون ( لازم التعليم يكون اولوية أولى ف العالم العربي )

كنت ف التاكسي انا ومنال ومونيا وخالد وزهر الدين وهارون، بقينا مش عارفين نرد عليه ، بس بجد نزلنا م التاكسي وكلام الراجل بيزن ف ودانا

سواق التاكسي التاني كان اصلة جريجي ( يوناني يعني ) قالي لو رحتى نورث كاروينا اقلعى الحجاب علشان هما هما متعصبين . الراجل باقله تعالى مصر قالى ( منين ! ) (الواحد هنا في امريكا بيشتغل علشان يسدد فواتيره ) قال كمان ان الظروف في اليونان بقت احسن ، باقله طب مما ترجع قالى ان مراته مجنونة وهو عايز يربي عياله ، لامبرو ( اسمه كده ) بقاله 30 سنة ف أمريكا بس مام طلبش الجنسية علشان هو ما عاوز ، هو عنده اقامة دايمة بيجددها ، ليه يا لامبرو كده ...( علشان هو بيحب جنسيته اليونانية ) ولما يروح اليونان مش عاوز يكون عنده جنسية تانية غير بلده ، لامبرو مش بيحب بوش ، باقوله طب ما الناس كلها مش بتحبه ، قالى لأ الناس في فوكس نيوز بتحبه

ارجع تاني وأسأل نفسي لما طارق حسن بيقول على جمال مبارك بيبنى بلده ، وعلى حسن نصر الله بيدمر بلده ، ولما الست بتاعة مجلة التايمز بتقول ان المسلمين بيؤمنوا ان ربنا قالنا ان ارض الشرق الأوسط بتاعتنا ، يبقى لازمة ام الاعلام ايه اذا كان بيضلل ام الناس ، الاعلام المفروض يعني يحسن حياة الناس ، يساعدهم على انهم يطورا نفسيهم . يبسطهم ...
ما علينا

الى البوست القادم


.

4 comments:

ibn_abdel_aziz said...

تعليقا علي العبارة الاخيرة
مش شرط يكون الواحد مضلل اعلاميا عشان رايه مختلف عنك
ممكن يكون واخد معلوماته من نفس المصادر بتاعتك وخرج بحكم اخر غيرك
وممكن تكوني انتي مضللة اعلاميا وفاكرةانك انتي اللي عارفة كل شئ والباقيين مضللين
من الحاجات اللي اتعلمتها في البلد دي من الناس اللي بتفكر وتبحث عن الحقيقة هو انك الحكم علي الافكار بانها ضالة او صادقة لا ياتي من جلسة او اثنين او ثلاثة

مثلا يعني
نصر الله بيدمر بلده
انا وانتي بنشوف الجزيرة
وانا بشوف سي ان ان
وبقرا للمدونين العرب والغربيين
وعندي مصادر للمعلومات من اتجاهات متعددة
ومن ناس مختلفين التوجهات
ورغم كدة رايي ان نصر الله بيدمر مش بيبني وشرحت في مدونتي في اكثر من 15 تدوينة مختلفة انا ليه رايي كدة
ما اظنيش ان مضلل او الاعلام غاسللي مخي

ده مش معناه اني حختلف معاكي في كل قضية او اتفق في كل قضية
النقطة اللي نفسي تخرجي منها ان شاء الله لنفسك من هذه الرحلة خاصة وانك مهتمة بمجال الاعلام وتوفير مصادر المعلومات للصحفيين واحنا اتكلمنا في الموضوع ده طبعا
انك مستعدة تتقبلي من شخص اخر مصادر معلومات هي نفسها مصادر معلوماتك بس ممكن يطلع براي عكسك تماما
وده هو اهم شئ

مثال اخر
انا مثلا ضد فكرة ان جمال مبارك بيبني البلد
ومع فكرة ان المسلمين بيعتبروا الشرق الاوسط عطية من الله
مش بالشكل المباشر ده
بس دي ادبيات الاسلاميين من قرن تقريبا
واللي محتواها ان اي ارض يحكمها المسلمين تصبح لهم وتخليهم عنها معصية
بمعني اخر
الارض اللي يحكمها مسلم تصبح عطية من الله و لايجوز له التفاوض فيها
مش دي المشكلة
بس عندك مثلا اسبانبا
حكمها المسلمون قرون
وانطردوا منها
ولو فكرنا بالعقلية دي نقول علي اسبانيا ايه؟
الاندلس المحتلة ؟
الشاهد هو اننا بنفكر في الحالي بعقلية ولغة الماضي
وبنقول ده اسمه " اسلامي" لاننا لقينا شوية كلام مكتوب في كتب الاقدمين

في النهاية عاوز اقول
من الرحلة دي بالذات اسمعي اكثر وراقبي وسجلي ملاحظات واستني لحد متتخمر واصبري
كل يوم له درس جديد

ما فيش حاجة ابيض واسود علطول
واللي بيخالفك في قضية س حيوافقك في قضية ص
ومش شرط يكون مغسول دماغه
لانك مش شرط يكون مغسول دماغك
:)

المهم طولت انا في الكلام كعادتي
اراكي علي خير ان شاء الله
السلام عليكم

Ironcobra said...

Not all Arab and Muslims in the U.S. are losers (just working their tail off to make ends meet).
And be careful with Pakistanis, I’ve dealt with tem long enough to say that.

Ironcobra said...

خلي بالك و ماتصدقيش كل حاجة تتقالك هنا الأمريكان أكبر نصابين في العالم و النصابين الأكبر هما اللي مش من اصل أمريكاني , أمثلة :
1-Working as an accountant makes damn good income, so you don’t need to work another job, plus kids are brought up here to start working from young age (they can still live in their parents house for free, and their parents pays for their tuitions and they might work to contribute to that or just to make some money to save or just to make an extra buck, and it’s part of the social system here).
2- Most of the European countries strip their citizens if they naturalized as citizens of other countries, but Living in the United States on a legal resident status gives you the best of two worlds.

Mohamed Amasha said...

مش عارف اقول ايه... العالم العربي فى كل حته حتي فى امريك.. رزق وسبوبة واتفتح للامريكان بقي