Friday, January 25, 2008

انبوكس حياتي





في كل مرة اقرر فيها أن ابدل موبايلي القديم ، كانت العقبة الكبيرة في الارقام التي لا تتسع ذاكرة اي شريحة لنقلها ( ربما المتمكنون في التكنولوجيا يضحكون الان لان هناك وسائل كثيرة لنقل ذاكرة الهواتف ) لكن كانت العقبة هي الارقام ، هذه المرة بعد أن ان ضاع الموبايل ( ربما للمرة الخامسة عشر ) قررت ولازمن ولابد هذه المرة أن انقل الارقام واتخلص من هاجس ان يضيع الموبايل مرة سادسة عشر بالارقام.
قمت بنقل الارقام ع الكومبيوتر ، وعندما الوقت ضاق قمت بنقلها علي ورق في المترو . وعندما بدأت في الحروف القبل الأخيرة اكتشفت ان هناك ما هو اثمن من الارقام في الموبايل وهي الرسائل اللي ع الموبايل
هذا الانبوكس جزء مهم جدا من حياتي ، لذا قررت ان اقرأ في انبوكسي بصوت عالي ، لان فيه تاريخ مهم جدا ( لي طبعا)...
أول رسالة م الأخر .. كانت من ابن عمتي منتصر في اول العام الهجري الجديد :
(دعواتي بالصحة والتوفيق بمناسبة قدوم العام الهجري الجديد ( منتصر الفيومي ) ٧ يناير ٢٠٠٨ )
الرسالة الأولي من منال مراة علاء / انا مش عارفة اسمها ايه بجد بس عارفة انها اسمها منال وعلاء بتقول فيها Sharqawi and Karim are out /٢٠ يناير ٢٠٠٧ . كانت بمناسبة الافراج عن محمد شرقاوي وكريم
هبة عبد الوهاب / المعروفة بين اصحابها باسم happy / هي معدة سابقة بالاوربت والمحور وبتشتغل في القسم الخارجي دلوقي في الاهرام،كانت منها الرسالة اللي قبلها بتبعتلي رقم تليفون وليد حداد مسئول في السفارة اللبنانية ، ابان الحرب الاسرائيلية علي لبنان ، الكلام ده طبعا كان في ٢٠٠٦، تحديدا في ٢ اغسطس.
--------------
( تروحي وترجعي بالسلامة يا امورتي، وقت ممتع باذن الله ، بالمناسبة دعوة المسافر لا ترد ، بوسة كبيرة ) ... رسالة نهي عاطف / والمسجلة علي هواتف محاميل اصدقائها باسم ( نهي تورتر ) Noha Torture -نهي تعذيب يعني - والمسجلة خطرة قوي علي الدولة التي يجب ان ندخلها امنيين ، ذي ما القران قال، بس عمرك ماتحس انك امن خالص.
نهي انشئت موقع الكتروني لنشر الوعي حول بشاعة التعذيب، ومتابعة القضايا التي يرفعها ضحاياه ضد الجلادين ، امي تفتكر نهي بين اصحابي اللي جم فطروا عندنا في رمضان ، بحاجتين ، انها طويلة وانها حطت البلح في ورق سولوفان ذي الشكولاته ، وحطت معاه ورق حظ ذي الشكولاته برضة ، بس بدل كلام العبط كتبت احاديث قدسية واحاديث نبوية .
ونهي الان رغم انها حتما تحت الخامسة والعشرين ، رئيس القسم الخارجي في جرنال الدستور، ولها عمود ، نهي لما تشوفها هاتسيب في قلبك حاجة جميلة ، ممكن ماتفتكرش اهم حاجات فيها ، طولها وشطارتها ، بس هاتسيب في قلبك حاجة جميلة ، تخليك تحس ان الدنيا فيها ناس نظيفة وطيبة " وطويلة" ذي نهي، الرسالة دي كانت بمناسبة سفري لامريكا في المنحة الشهرين بتاعة السنة اللي فات. وتاريخها ٣ اكتوبر ٢٠٠٦

( يا كبدي يا بنتي ، آنا عندي بقايا سمك ورز هابعتهالك في الرسالة الجاية ) .. رد اختي نجلاء علي رسالتلي ليها ( انا جعانة ..!!) اللي بعتهلها من نص الكلاس في المنحة اللي فاتت برضة ، لانه كان رمضان وكان فرق التوقيت بيخلي مصر تفتطر الأول ، وكان اول رمضان اقضيه بره مصر ، تاريخ الرسالة ١٨ اكتوبر ٢٠٠٦.
( ٢٠ جنيه لست عيال كلهم ولا كل عيل ٢٠ جنيه لوحده ؟) سؤال اختي نجلاء علي الرسالة اللي بعتهلها اقولها تدي العيال - ولاد اخواتي يعني ولادها وولاد نورا - عدية وانا هابقي احسابها ، وطبعا ردي عليها هو ان " طبعا" العيال الستة كلهم ٢٠ جنيه وطبعا مش سمعت كلامي. الكلام عن العيد الصغير وتاريخ الرسالة هو ٢١ اكتوبر.
( وحشتيني يا عسولة :-) ان شالله بخير ومبتسمة ، قولي لنفسك في المراية انا حلوة وربنا بيحبني و وانا بحبك وبحب جنانك) نهي عاطف ١٦ ، يونيو ٢٠٠٧
...(الرجل اسمه محمد !!!) ماعنديش اي فكرة عن مين بعت الرسالة ومين محمد ده ، بس ممكن تكون السطر ده مفيد للناس اللي بيعانو زهايمر ذي

(اهلا يا خلتو .. صباح وحشتينا احنا مستنيين لحظة رجوعك من بدري احنا صاحيين من الساعة ٨ ، علشان نعمل مفاجأة بسبب رجوعك انا وسهيلة ، يا رب ترجعي بالسلامة سهيلة وسلمي
٣١ يوليو ٢٠٠٧
سلمي بنت اختي ربنا يحميها والله عندها اخلاق احسن من ناس كبار خالص ، دايما بافتكر في عيد ميلادها لما كان عندها ٦ سنين وامها عملتلها العيد ميلاد في محل بيتزا ، واصحبها في المدرسة جوم ، كان الاراجوز شغال ، وسلمي قامت تجيب ماعرفش بلونة ولا ايه رجعت لقت ولد تاني قاعد علي كرسيها ومافيش كرسي تاني فاضي - وهي صاحبة عيد الميلاد ، الولد جه يقوم راحت سلمي الجميلة ابتسمتله وراحت بعيد تجيب كرسي تاني تقيل وتشده - والاراجوز شغال . مرة واحدة زميلتي / في مكان عملي الحالي / جت لقتني قاعدة علي كرسيها وشنطتي علي كتفي وباخلص كلام مع واحد زميل تاني ، تفتكرو عملت زي سلمي ؟ لا طبعا ، وقفت علي دماغي ، اقولها ثانيه يا نهـ.. واسيبلك الكرسي تقولي لأ عاوزة اقعد دلوقتي!! تخيلو ؟ الاخلاق مش فيها كبار وصغيريين


حاجات كتير ورسايل اكتر
بس يا دوب علشان اخلص الهوم ورك
يمكن تيجي فرصة تانية اكمل الرسايل
بس اكيد امرة الجاية هاتكون عن الكلاب
وهو امر لو تعلمون عظيم في هذه البلد
الصور :
سلمي في النص بين سهيلة وسيف اخواتها
نهي عاطف


No comments: